පද්මේගේ අයිස් නිෂ්පාදන කර්මාන්ත ශාලාවක් සොයා ගනී – ඇමති ආනන්ද විජේපාලගෙන් අනාවරණයක්

නුවරඑළියේ අයිස් නිෂ්පාදනය කරන කර්මාන්ත ශාලාවක් විමර්ශනවලින් සොයාගෙන ඇති බව මහජන ආරක්ෂක අමාත්‍ය ආනන්ද විජේපාල මහතා පවසනවා.

අමාත්‍යවරයා මෙම අදහස් පළ කළේ ඊයේ (02) ස්වාධීන රූපවාහිනී සේවයේ පැවැති දේශපාලන වැඩසටහනකට එක්වෙමින්.

මන්දිනු පද්මසිරි නොහොත් කෙහෙල්බද්දර පද්මේ මෙම කර්මාන්ත ශාලාව සඳහා රුපියල් මිලියන 4කට වඩා ආයෝජනය කර ඇති බව ඔහු මෙහිදී සඳහන් කළා.

ඒ මහතා කියා සිටියේ ඖෂධ කර්මාන්ත ශාලාව පවත්වාගෙන යාම සඳහා නුවරඑළියේ නිවසක් කුලියට ගෙන ඇති බවත් ඒ සඳහා රසායනික ද්‍රව්‍ය කිලෝ 2000කට වඩා රට තුළ ගෙනැවිත් ඇති බවත්ය.

“එයාලා ලංකාවේ ICE නිෂ්පාදනය කරලා තියෙනවා. මේක බරපතළ ගැටළුවක්. මේ වන විට සිදුකරන පරීක්ෂණ මඟින් මෙම තොරතුරු හෙළි වෙලා තියෙනවා. ඒ සම්බන්ධව අපි වඩාත් ගැඹුරු පරීක්ෂණ පැවැත්වීමට සිදුකරනවා.”

ඊට අමතරව පාතාල සාමාජිකයින් විසින් පවත්වාගෙන යනු ලබන ව්‍යාජ විදේශ ගමන් බලපත්‍ර ලබා ගැනීම සඳහා දේශපාලන සබඳතා, පොලිස් නිලධාරීන් සමඟ සබඳතා, ආගමන හා විගමන දෙපාර්තමේන්තුවේ නිලධාරීන් සමඟ සබඳතා පිළිබඳ තොරතුරු හෙළිව ඇති බවද ඔහු පවසනවා.

අමාත්‍යවරයා වැඩිදුරටත් සඳහන් කළේ මෙම තොරතුරු තහවුරු කිරීම සඳහා තවදුරටත් ගැඹුරු පරීක්ෂණ ආරම්භ කර ඇති බවයි.