හර්ෂණ නානායක්කාරට එරෙහි විශ්වාසභංගය අද විවාදයට

අධිකරණ අමාත්‍ය නීතීඥ හර්ෂණ නානායක්කාර මහතාට එරෙහිව විපක්ෂය ඉදිරිපත් කළ විශ්වාසභංග යෝජනාව අද (24) පාර්ලිමේන්තුවේදී විවාදයට ගැනීමට නියමිතව තිබෙනවා.

පසුගිය බදාදා රැස්වූ පාර්ලිමේන්තු කටයුතු පිළිබඳ කාරක සභාව මෙම තීරණය ගෙන ඇති බව පාර්ලිමේන්තුවේ සන්නිවේදන දෙපාර්තමේන්තුව සඳහන් කළා.

මීගමුව බන්ධනාගාරයේ ඇති වූ සිද්ධියේදී රැඳවියන්ගේ සහ බන්ධනාගාර නිලධාරීන්ගේ ආරක්ෂාව සම්බන්ධයෙන් සිය වගකීම සහ වගවීම ඉටු කිරීමට අසමත් වූ බවට චෝදනා කරමින් විපක්ෂය මෙම විශ්වාසභංග යෝජනාව පසුගිය 21 වැනිදා කථානායක වෛද්‍ය ජගත් වික්‍රමරත්න මහතා වෙත භාරදී තිබුණා.

අද පාර්ලිමේන්තු කටයුතු අනුව උදෑසන 9.30 සිට 10.00 දක්වා ස්ථාවර නියෝග 22 යටතේ කටයුතු සිදු කෙරෙන අතර, පෙරවරු 10.00 සිට 11.00 දක්වා වාචික පිළිතුරු අපේක්ෂා කරන ප්‍රශ්න සඳහාත්, පෙරවරු 11.00 සිට 11.30 දක්වා ස්ථාවර නියෝග 27(2) යටතේ ප්‍රශ්න සඳහාත් කාලය වෙන්කර තිබෙනවා.

ඉන් අනතුරුව පෙරවරු 11.30 සිට පස්වරු 5.30 දක්වා කාලය තුළ අධිකරණ අමාත්‍යවරයාට එරෙහි විශ්වාසභංග යෝජනාව විවාදයට ගැනීමට නියමිතයි.

ඒ හේතුවෙන් අද විවාදයට ගැනීමට සැලසුම් කර තිබූ පෞද්ගලික මන්ත්‍රී යෝජනා ඉදිරි දිනයකදී විවාදයට ගැනීමට තීරණය කර තිබෙනවා.