අධිකරණ ඇමති සංශෝධන ඉල්ලා අස්කර ගනී

වයස අවුරුදු 14ත් 16ත් අතර ගැහුණු දරුවෙකු සිය කැමැත්ත සහිතව වයස අවුරුදු 22ට අඩු පුද්ගලයෙකු සමඟ ලිංගික සබඳතාවක් පැවැත්වුවහොත් ඊට ලබාදෙන දඬුවම ලිහිල් කිරීමට අදාළව රජය ගෙන ඒමට යෝජිත සංශෝධන ඉල්ලා අස්කර ගත් බව අධිකරණ අමාත්‍ය විජයදාස රාජපක්ෂ මහතා පවසනවා.

අද (01) පාර්ලිමේන්තුවේදී ප්‍රකාශයක් සිදු කරමින් අමාත්‍යවරයා මේ බව කියා සිටියා.

“මෙම පනත් කෙටුම්පත ජනාධිපති නීතීඥවරු වෙනත් නීතීඥවරු සහ වෘත්තිකයින් කිහිපදෙනෙකු එකතුවෙලා අවුරුදු 5ක් පමණ අධ්‍යයනය කරලා තමයි, මේ නිර්දේශය අධීකරණ අමාත්‍යාංශයට ලබාදුන්නේ.

මේ නඩු මහාධිකරණයට එනකොට 90%ක්ම ඒගොල්ලෝ වැඩිවියට පත්වෙලා. විවාහ වීමට හැකියාව තියෙනවා. ඒ අයට දරුවොත් ඉන්නවා. සමහර අය බැඳලා. සමහර අය බඳින්න කැමතියි. නමුත් අනිවාර්යය දඬුවමක් නිසා ඒ තරුණයා අනිවාර්යයෙන්ම අවුරුදු 10ක් හිරේ යවන්න ඕනේ.

මේක ප්‍රායෝගික ප්‍රශ්නයක්. මේක මානූෂිය පැත්තෙන් බලලා ශ්‍රේෂ්ඨාධිකරණය නඩු තීන්දු 3ක් දීලා තියෙනවා. පොතේ තියෙන්නේ එක නීතියක් හැබැයි අධිකරණය අනුගමනය කරන්නේ වෙනම නීතියක්.

මේ දෙක සැසඳෙන තත්ත්වයක් රටේ ති‍යෙන්න ඕනේ. නැතිනම් මේක ගැටලුවක්. නීතියේ තියෙනවා එකක් අධිකරණයේ තියෙනවා එකක්. ඉල්ලීම් සලකලා බලලා අපි මේක ඉල්ලා අස්කර ගන්නවා. ඉදිරියේ දී කාටත් එකඟවෙන්න පුළුවන් සං‍ශෝධනයක් තියෙනවා නම් අපි ඉදිරිපත් කරන්නන්.”

දණ්ඩ නීති සංග්‍රහයේ 19 වන පරිච්ඡේදය සංශෝධනය කිරීම සඳහා වූ පනත් කෙටුම්පතක් පසුගිය පෙබරවාරි 13 වනදා ගැසට් මඟින් ප්‍රකාශයට පත් කර තිබුණා.

අධිකරණ බන්ධනාගාර කටයුතු සහ ආණ්ඩුක්‍රම ව්‍යවස්ථා ප්‍රතිසංස්කරණ අමාත්‍ය ආචාර්ය විජයදාස රාජපක්ෂ මහතාගේ නියමයන් පරිදි එය ප්‍රකාශයට පත් කර තිබුණේ දණ්ඩ නීති සංග්‍රහයේ 363 සහ 364 සංශෝධනය කරමිනි.

යෝජිත සංශෝධනයට අනුව වයස අවුරුදු 14ත් 16ත් අතර ගැහැණු දරුවෙකු වයස අවුරුදු 22කට අඩු පුද්ගලයෙකුට සිය කැමැත්තක් ඇතිව ලිංගික සබඳතාවක් පැවැත්වුවහොත් දඬුවම ලිහිල් කිරීමට මෙමඟින් යෝජනා කර තිබුණා.