පවන්, දසුන්, ජනිත් සහ අවිශ්ක යන ක්‍රීඩකයින්ගේ සුවිශේෂී දක්ෂතා හේතුවෙන් ශ්‍රී ලංකා කණ්ඩායම අත්කර ගන්නා ලද මෙම ඓතිහාසික ජයග්‍රහණය ඉහළින්ම සැමරීමට ශ්‍රී ලංකා කණ්ඩායමට පූර්ණ හිමිකම් ඇති බව ශ්‍රී ලංකා හිටපු ක්‍රිකට් නායක කුමාර් සංගක්කාර පවසනවා.
සිය ‘X’ (ට්විටර්) ගිණුමේ විශේෂ සටහනක් තබමින් ඔහු පෙන්වා දුන්නේ, මෙම ජයග්‍රහණයේ ප්‍රීතිය විඳගන්නා අතරතුරම, ඉදිරි අනාගත අභියෝග ජයගැනීම සඳහා කණ්ඩායමේ අවධානය අඛණ්ඩව යොමුවිය යුතු බවයි.
ලබන වසරේ ඔක්තෝබර් මාසයේදී දකුණු අප්‍රිකාවේ පැවැත්වීමට නියමිත ලෝක කුසලාන ක්‍රිකට් තරගාවලිය ඉලක්ක කරගනිමින් කණ්ඩායම ශක්තිමත් කිරීමේ දීර්ඝකාලීන සැලසුම් ක්‍රියාත්මක කිරීමේ වගකීම ශ්‍රී ලංකා ක්‍රිකට් බලධාරීන් සතු බව ද ඔහු අවධාරණය කරනවා.
ඒ අනුව කණ්ඩායම ජාත්‍යන්තරයේ ඉහළම තත්ත්වයට ගෙන ඒම සඳහා මෙම ජයග්‍රහණයේ සිටම ක්‍රමානුකූල වැඩපිළිවෙලක් සකස් කිරීම අත්‍යවශ්‍ය බව කුමාර් සංගක්කාර සිය ‘X’ සටහනෙන් වැඩිදුරටත් පෙන්වා දී තිබෙනවා.
පාකිස්තාන තුන්කොන් එක්දින ක්‍රිකට් තරගාවලිය යටතේ ඊයේ (22) පැවති තරගයෙන් ප්‍රබල එංගලන්ත කණ්ඩායම කඩුලු 2කින් පරාජය කිරීමට ශ්‍රී ලංකා කණ්ඩායම සමත් වුණා.
රාවල්පින්ඩිහිදී පැවැති මෙම තීරණාත්මක තරගයේදී එංගලන්ත කණ්ඩායම විසින් ලබාදුන් ලකුණු 430ක අති දැවැන්ත ඉලක්කය, තරගයේ පන්දු වාර 49.5කදී එනම් තවත් එක් පන්දුවක් පමණක් ඉතිරිව තිබියදී පසුකර යෑමට ශ්‍රී ලංකා පිතිකරුවෝ සමත් වූයේ ලෝක ක්‍රිකට් ඉතිහාසයට අලුත් පිටුවක් එකතු කරමිනි.
Leave a Reply