අල්ලස් කොමිසම මඟින් අත්අඩංගුවට ගත් හිටපු අමාත්ය ශෂීන්ද්ර රාජපක්ෂ මහතා ලබන 19 වනදා දක්වා රක්ෂිත බන්ධනාගාර ගත කරන ලෙස කොළඹ මහේස්ත්රාත් අධිකරණය නියම කර තිබෙනවා.
කොළඹ ප්රධාන මහෙස්ත්රාත් තනූජා ලක්මාලී ජයතුංග මහත්මිය මෙම නියෝගය නිකුත් කළේ අල්ලස් කොමිසමේ නිලධාරීන් හා විත්තියේ නීතිඥවරු ඉදිරිපත් කළ කරුණු සලකා බැලීමෙන් අනතුරුවයි.
මහවැලි අධිකාරියට අයත් සෙවනගල, කිරිඉබ්බන් වැව ප්රදේශයේ පිහිටි ඉඩමක අනවසරයෙන් ඉදිකර ඇති ගොඩනැගිල්ල ඇතුළු දේපොළ කිහිපයක් 2022.05.09 වන දින පැවැති ජනතා අරගලයේ දී හානියට පත් වුණා.
එම දේපොළ සඳහා වන්දි ගෙවීමේ දී එය ශ්රී ලංකා මහවැලි අධිකාරිය සතු දෙපොළක් බවට හඳුනාගෙන අදාළ වන්දි ගෙවීම ප්රතික්ෂේප කර තිබියදී ඊට පටහැනිව හානි පුර්ණය සඳහා වන කාර්යාලයට අනුයුක්තව කටයුතු කළ සමහර රජයේ නිලධාරීන්ට තම නිල බලය භාවිත කරමින් බලපෑම් සිදුකර ඇති බවට ශෂින්ද්ර රාජපක්ෂ මහතාට චෝදනා එල්ල වී තිබෙනවා.
තවද එම වන්දි ලබා ගැනීමෙන් දූෂණය නැමැති වරද සිදු කිරීම සහ කුමන්ත්රණය කිරීම මෙන්ම මෙම දේපොළ මහවැලි අධිකාරිය සතු ඉඩමක පැවැති බැවින් මහවැලි අධිකාරිය සතු දේපොළක් සාපරාධී සාවද්ය පරිහරණය තුළින් 1999 අංක 28 දරණ පනතින් සංශෝධිත 1982 අංක 12 දරන පොදු දේපොළ විෂයෙහි සිදුකරනු ලබන වැරදි පිළිබඳ 5(1) වගන්තිය යටතේ දඬුවම් ලැබිය හැකි වරදක් සම්බන්ධයෙන් ශෂීන්ද්ර රාජපක්ෂ මහතාව එලෙස අත්අඩංගුවට ගෙන ඇති බව සඳහන්.
Leave a Reply