නේපාලයේ චීන සහ ටිබෙට් දේශසීමා ආසන්නයේ පිහිටි රසුවා ප්රදේශයට බලපෑ විනාශකාරී හදිසි ගංවතුර තත්ත්වයෙන් ආපදාවට ලක්වූ ශ්රී ලාංකිකයන් පිළිබඳව මෙතෙක් කිසිදු තොරතුරක් වාර්තා වී නොමැති බව විදේශ කටයුතු අමාත්යාංශය පවසනවා.
නිවේදනයක් නිකුත් කරමින් එහි මාධ්ය ප්රකාශක තුෂාර රොඩ්රිගෝ මහතා සඳහන් කළේ, නේපාලයේ වෙසෙන සහ සංචාරයේ නිරත ශ්රී ලාංකිකයන් පිළිබඳව විදේශ කටයුතු අමාත්යාංශය නිරන්තර විපරමින් පසුවන බවයි.
මෙම හදිසි ගංවතුර තත්ත්වය හේතුවෙන් මේ වන විට පුද්ගලයින් 18 දෙනෙකු මියගොස් ඇති අතර, විදේශීය සංචාරකයින් 291 දෙනෙකු ඇතුළුව තවත් 400 දෙනෙකු පමණ අතුරුදන්ව ඇති බව විදෙස් මාධ්ය වාර්තා කරනවා.
නේපාල දේශසීමාවේ පිහිටි ග්ලැසියරයකින් අයිස් සහ ගල් සහිත විශාල නායයෑමක් සිදුවී භෝටේ කොෂි ගඟේ අතු ගංගාවක් වන ලෙන්ඩේ කොලා ගඟ අවහිර වීම මීට ප්රධාන හේතුව වී තිබේ. එමගින් එකතු වූ දැවැන්ත ජල කඳක් එකවරම පහළ ප්රදේශ වෙත කඩා වැදීමෙන් මෙම විනාශකාරී තත්ත්වය හටගෙන ඇත.
ගංවතුර හේතුවෙන් භෝටේ කොෂි ගංගාව ආසන්නයේ පිහිටි ප්රධාන මහා මාර්ගයක් සම්පූර්ණයෙන්ම යටවී ඇති අතර, චීන දේශසීමාවේ පිහිටි චීන රජයට අයත් ගොඩනැගිල්ලක් ද විනාශ වී ඇති බව සඳහන් වනවා.
ඊට අමතරව රසුවා දිස්ත්රික්කයේ යටිතල පහසුකම්, පාලම් සහ විදුලි බලාගාර ව්යාපෘති රැසකට දැඩි හානි සිදුව ඇති අතර, ටිබෙටයේ අසල්වැසි ගිරොං ප්රාන්තයෙන් ද දැඩි මඩ නායයෑම් සහ ජීවිත හානි වාර්තා වී තිබෙනවා.
Leave a Reply