ඉන්ධන මිල ස්ථාවර කරගන්න හිටපු CPC සභාපතිගෙන් උපදෙසක්

ඉන්ධන මත පනවා ඇති බදු අඩු කරමින් හැකි තරම් ඉන්ධන මිල ස්ථාවර අගයක පවත්වාගත යුතු බව ඛනිජ තෙල් නීතිගත සංස්ථාවේ හිටපු සභාපති මොහොමඩ් උවයිස් මහතා පවසනවා.

මාධ්‍ය හමුවකට එක්වෙමින් ඔහු සඳහන් කළේ මේ වන විට හෝමූස් සමුද්‍ර සන්ධිය වසා දැමීම හේතුවෙන් යේමනය සහ අප්‍රිකානු මහද්වීපය අතර පවතින තවත් සමුද්‍ර සන්ධියක් වසා දැමීමට ඉරානය තීරණය කළහොත් ලංකාව ඇතුළු රටවල් රැසකට ප්‍රබල බලපෑමක් ඇතිවිය හැකි බවයි.

මේ හේතුවෙන් ඉන්ධන සැපයුම්කරුවන් සමඟ නිසි සම්බන්ධතාවක් පවත්වාගනිමින් සහ තොග කළමනාකරණ කරමින් නිසි කළමනාකරණයකින් යුතුව සිදු කළහොත් ඇති වන ගැටළු අවම කරගත හැකි බව ඔහු පෙන්වා දෙනවා.

“මේ ප්‍රශ්නය ගත්තොතින් ලංකාව 100%ක් ම ඛනිජ තෙල් ආනයනය කරන රටක්. අපි දැනටම රුපියල් 25ක් සියලු තෙල්වලට මිල වැඩිකළා. මේ යන යෑමට ලෝක වෙළෙඳපොළේ තෙල් මිල තවත් වැඩි වීමට නියමිතයි. රටක් ලෙස අපි මේ වෙලාවේ දෙකක් කළ යුතුයි. එකක් අපේ සැපයුම නිසියාකාරව කළමනාකරණය කර ගැනීම සහ සැපයුම්කරුවන් එක්ක නිසි සම්බන්ධතාවෙන් යුතුව වැඩ කළ යුතුයි. ඊට අමතරව මේ එන පීඩනය අපේ කර්මාන්තකරුවන්ට සහ පාරිභෝගිකයින්ට දරාගන්න අමාරුයි. මේ මොහොතේ තමයි රජය කරන්න ඕනේ මැදිහත් වෙලා බදු අඩුකරලා ජනතාව මත සම්පූර්ණ පීඩනය පටවන්නේ නැතිව ජනතාවගෙන් කොටසක් සහනාධාරයක් ලෙස බදු අඩුකරලා ඉන්ධන මිල පුළුවන් තරම් උච්ඡාවඡනය නොවන ආකාරයට තියාගත යුතුයි කියන එක තමයි මගේ මතය. අපි සියලු දෙනාම දන්නවා හෝමූස් සමුද්‍ර සන්ධිය වහලා තියෙනවා. ඊට අමතරව තව සමුද්‍ර සන්ධියක් තියෙනවා යෙමනය සහ අප්‍රිකානු මහද්වීපය අතර එතනින් 12%ක් විතර තෙල් ගමනාගමනය සිදුවෙනවා. ඉරානය තවත් සන්නද්ධ කොටසක් ඒ මාර්ගයත් අවහිර කරයි එහෙම කළොතින් මේ දෙකම වැහුවොත් 35%ක් විතර තෙල් ගමනාගමනය අඩපණ වෙනවා එහෙම වුණොත් ලොකු පීඩනයක් අපේ රටවල්වලට ඇතිවෙනවා ඒ හින්දා මේ මොහොතෙදි අපි විවිධ නවීන උපක්‍රම යොදාගෙන සැපයුම් ජාලයට බලපෑමක් ඇති නොවන විදිහට කටයුතු කරගත යුතුයි.”