අල්ලස් ගත් යුද හමුදා ලාන්ස් කෝප්‍රල්වරයා රිමාන්ඩ්

රුපියල් 129,600 ක මුදලක් අල්ලස් වශයෙන් ඉල්ලා ලබාගැනීමේ චෝදනාව මත අනුරාධපුර, පණ්ඩුලගම යුද හමුදා කඳවුරේ සේවය කරන ලාන්ස් කෝප්‍රල්වරයෙකු අල්ලස් හෝ දූෂණ චෝදනා විමර්ශන කොමිෂන් සභාව විසින් අත්අඩංගුවට ගෙන තිබෙනවා.

අත්අඩංගුවට ගෙන ඇත්තේ දිසානායක මුදියන්සේලාගේ සජිත් සමීර දිසානායක නැමති හමුදා සේවකයායි.

අල්ලස් කොමිෂන් සභාවට ලැබුණු පැමිණිල්ලකට අනුව සිදුකළ විමර්ශනයකදී අනාවරණය වී ඇත්තේ, යුද හමුදාවෙන් විශ්‍රාම ලබා සිටින පුද්ගලයෙකුට ඔහුගේ විශ්‍රාම ණය මුදල් පියවීමට උදව් කළ හැකි බව පවසා සැකකරු මෙම වංචාව සිදුකර ඇති බවයි.

පැමිණිලිකරුගේ ණය විස්තර ලබාගෙන ඇති සැකකරු, රුපියල් ලක්ෂ 25 ක ආධාර මුදලක් ලබා දෙන බව පවසා ඇත.

එම ආධාරය ලබා ගැනීමට පෙර ගෙවිය යුතු මුදල් ලෙස පවසමින් අවස්ථා තුනකදී අල්ලස් වශයෙන් රුපියල් 129,600ක් මුදලක් බැංකු ගිණුමකට බැර කරවාගෙන තිබෙනවා.

අනතුරුව, ලේඛන ගාස්තු වශයෙන් තවත් රුපියල් 13,457ක මුදලක් අල්ලස් ලෙස ඉල්ලා ඇති බව විමර්ශනවලදී හෙළිව ඇත.

අල්ලස් හෝ දූෂණ චෝදනා විමර්ශන කොමිෂන් සභාවේ නිලධාරීන් විසින් සැකකරු පසුගිය (30) වෙනිදා අත්අඩංගුවට ගෙන ඇති බව සඳහන්.

අත්අඩංගුවට ගත් සැකකරු කොළඹ ප්‍රධාන මහෙස්ත්‍රාත් අධිකරණය වෙත ඉදිරිපත් කිරීමෙන් අනතුරුව එළැඹෙන 08 වෙනිදා දක්වා රක්ෂිත බන්ධනාගාරගත කිරීමට නියෝග කර තිබෙනවා.