පාකිස්තානයේ රාවල්පින්ඩි ක්‍රීඩාංගණයේදී පැවැති තෙවන විස්සයි20 ජාත්‍යන්තර ක්‍රිකට් තරගයෙන් සූර පාකිස්තාන කණ්ඩායම කඩුලු 8කින් පරාජයට පත්කරමින් විශිෂ්ට ජයක් වාර්තා කිරීමට ශ්‍රී ලංකා කණ්ඩායම සමත් වුණා.
ලකුණු 169ක ප්‍රබල ජයග්‍රාහී ඉලක්කයක් හඹා ගිය ශ්‍රී ලංකා සිංහයන් පන්දුවාර 17යි පන්දු 1ක් අවසානයේ කඩුලු 2ක් පමණක් දැවී ලකුණු 172ක් රැස් කරමින් ඉතා පහසුවෙන් තරගයේ ජයග්‍රහණය තහවුරු කරගත්තා.
ශ්‍රී ලංකා ඉනිමේ නැංගුරම බවට පත්වෙමින් නායකත්වයේ ඉනිමක් ක්‍රීඩා කළ කුසල් මෙන්ඩිස් පන්දු 48කදී වේගවත් හතරේ පහර 9ක් සහ දැවැන්ත හයේ පහර 4ක් සමඟින් නොදැවී විශිෂ්ට ලකුණු 87ක් රැස් කළා.
ඔහුට අගනා සහයක් ලබාදුන් කමින්දු මෙන්ඩිස් පන්දු 27කදී නොදැවී ලකුණු 40ක් ලබාගත් අතර, ආරම්භක පිතිකරු සිනෙත් ජයවර්ධන පන්දු 26කදී ලකුණු 38ක් රැස් කරමින් ශ්‍රී ලංකා ඉනිමට සාර්ථක ආරම්භයක් ලබා දුන්නා.
කාසියේ වාසිය දිනා පළමුවෙන් පන්දුවට පහරදුන් පාකිස්තාන කණ්ඩායම නියමිත පන්දුවාර 20 අවසානයේ කඩුලු 8ක් දැවී ලකුණු 168ක් ලබාගත්තා. පාකිස්තාන ඉනිම වෙනුවෙන් නායක සහිබ්සාදා ෆර්හාන් පන්දු 47කදී හතරේ පහර 7ක් සහ හයේ පහර 3ක් සමඟින් ලකුණු 76ක් රැස් කළ අතර, අරාෆත් මින්හාස් නොදැවී ලකුණු 34ක් ලබා ගැනීමට සමත් වුණා.
පන්දු යැවීමේදී දක්ෂ පන්දු යැවීමක නිරත වූ දසුන් ශානක ලකුණු 21කට කඩුලු 3ක් දවාගැනීමට සමත් වූ අතර, නුවන් තුෂාර සහ එෂාන් මාලිංග කඩුලු 2 බැගින් බිඳහෙළමින් පාකිස්තාන පිතිකරුවන් මෙල්ල කිරීමට සමත් වුණා.
Leave a Reply