කැලිෆෝනියා ප්‍රාන්තයේ මරණ දඬුවම නියම වී සිටින සිරකරුවන් 548 දෙනාගේම දඬුවම සංශෝධනය කර, එය ඇප ලබාගත නොහැකි ජීවිතාන්තය දක්වා වූ සිරදඬුවම් බවට පත් කිරීමට ප්‍රාන්ත ආණ්ඩුකාර ගැවින් නිව්සම් (Gavin Newsom) තීරණය කර තිබෙනවා.
ජනතාව වෙත විවෘත ලිපියක් යොමු කරමින් ආණ්ඩුකාරවරයා සඳහන් කර ඇත්තේ, වින්දිතයින් සැමවිටම මතක තබා ගනිමින් සහ ඔවුන්ට ගෞරව කරන අතරම, මෙම වැරදිකරුවන්ට කිසිවෙකුගේ අවධානයක් නොමැතිව සිරගෙදරදීම මිය යාමට ඉඩ හැරිය හැකි බවයි.
2006 වසරෙන් පසු කිසිදු සිරකරුවෙකුට මරණ දඬුවම ක්‍රියාත්මක කර නොමැති ප්‍රාන්තයක් තුළ මෙම තීරණය සංකේතාත්මක එකක් වන අතර, වසරකට අධිකරණ පිරිවැය ලෙස වැයවන ඩොලර් මිලියන ගණනක මුදලක් ඉතිරි කර ගැනීමට මෙයින් හැකි වන බව විශේෂඥයෝ පෙන්වා දෙනවා.
1978 දී ඡන්දදායකයින් විසින් මරණ දඬුවම නැවත ස්ථාපිත කළ තැන් පටන් කැලිෆෝනියා ප්‍රාන්තයේ ක්‍රියාත්මක කර ඇත්තේ සිරකරුවන් 13 දෙනෙකුගේ මරණ දඬුවම පමණි.
අමෙරිකාවේ වැඩිම ජනගහනයක් සහිත ප්‍රාන්තයේ ඩිමොක්‍රටික් පක්ෂ නායකයා වන ගැවින් නිව්සම්, ඉදිරි ජනාධිපතිවරණය සඳහා ඉදිරිපත් විය හැකි අපේක්ෂකයෙකු ලෙස සාකච්ඡා වෙමින් පවතින පසුබිමක මෙම පියවර ගෙන තිබෙනවා.
ධුර කාල සීමාවන් හේතුවෙන් සිය ධුරයේ අවසාන මාස කිහිපය ගත කරමින් සිටින නිව්සම්ගෙන් පසුව, ඉදිරි මැතිවරණයෙන් ඩිමොක්‍රටික් පක්ෂයේම ඛේවියර් බෙසෙරා (Xavier Becerra) අදාළ ධුරයට පත්වනු ඇතැයි අපේක්ෂා කෙරෙනවා.
Leave a Reply