ස්විට්සර්ලන්තයේ සූරිච් නුවර පැවැති ඩයමන්ඩ් ලීග් මලල ක්රීඩා තරගාවලියේ පිරිමි හෙල්ල විසිකිරීමේ ඉසව්වේ ප්රථම ස්ථානය දිනාගැනීමට ශ්රී ලංකාවේ රුමේෂ් තරංග අද (28) අලුයම සමත් විය.
මෙරට වේලාවෙන් අද අලුයම නිමාවට පත් වූ මෙම තරගයේදී රුමේෂ් මීටර් 92.07ක විශිෂ්ට දක්ෂතාවක් දක්වමින් තරගයේ ජය හිමිකර ගත්තේය. රුමේෂ් සිය වෘත්තීය ක්රීඩා ජීවිතය තුළ මීටර් 92 සීමාව අබිබවා ගිය දෙවන අවස්ථාව මෙය ලෙස සටහන් වේ. ඔහු මීට පෙර ඉකුත් ජූනි මාසයේ පැවැති රෝම ඩයමන්ඩ් ලීග් තරගාවලියේදී මීටර් 92.62ක දුරක් වාර්තා කරමින් නව ජාතික වාර්තාවක් පිහිටුවීමටද සමත් විය.
මෙම තරගයේ දෙවන ස්ථානය මීටර් 86.93ක දක්ෂතාවක් දැක්වූ ග්රෙනාඩාවේ හිටපු ලෝක ශූර ඇන්ඩර්සන් පීටර්ස්ට හිමිවූ අතර, මීටර් 85.16ක පෞද්ගලික හොඳම දුර වාර්තා කළ පෝලන්තයේ ඩේවිඩ් වෙග්නර් තෙවන ස්ථානය දිනාගත්තේය. ලන්ඩන් ඔලිම්පික් රන් පදක්කම්ලාභී කෙෂෝන් වෝල්කොට් සිව්වන ස්ථානයටත්, කෙන්යාවේ ජූලියස් යෙගෝ පස්වන ස්ථානයටත් පත් වූ අතර ඉන්දියාවේ නීරාජ් චොප්රා මෙම තරගයට එක්ව සිටියේ නැත.
වත්මන් ලෝක හෙල්ල විසිකිරීමේ ශ්රේණිගත කිරීම්හි පළමු ස්ථානයේ පසුවන 23 හැවිරිදි රුමේෂ්, මෑතකදී පැවැති පොදුරාජ්ය මණ්ඩලීය ක්රීඩා උළෙලේදී ද මීටර් 89.75ක දක්ෂතාවක් දක්වමින් රන් පදක්කම දිනාගත්තේය.
ඔහු මේ වසරේ සහභාගි වූ තරග 12න් තරග 11කම ජය හිමිකරගෙන ඇති අතර, ඊට රෝම, ඔස්ට්රාවා සහ දෝහා යන ඩයමන්ඩ් ලීග් අදියරයන්හි ජයග්රහණ ද ඇතුළත් වේ.
Leave a Reply