විනිමය අනුපාතයක් දිහා බලලා රටක ආර්ථිකය හොඳද නරකද කියලා කියන්න බෑ

ශ්‍රී ලංකා රුපියල මේ වසර තුළ අවප්‍රමාණය වීමට මැදපෙරදිග කලාපයේ පවතින අර්බුදකාරී තත්ත්වය සහ එහි ප්‍රතිඵලයක් ලෙස ගෝලීය තෙල් මිල ඉහළ යාම ප්‍රධාන හේතුව වී ඇති බව මහ බැංකු අධිපති ආචාර්ය නන්දලාල් වීරසිංහ මහතා පවසනවා.

අධිපතිවරයා මේ බව සඳහන් කළේ අද (18) පැවැති මාධ්‍ය හමුවකට එක්වෙමින්.

තෙල් ආනයනය සඳහා විදේශ විනිමය අවශ්‍යතාව ඉහළ යාම සමඟ රුපියල මත පීඩනයක් එල්ල වී ඇති බවද ඔහු පැවසුවා.

ඒ මහතා පෙන්වා දෙන්නේ 2026 වසර තුළ ශ්‍රී ලංකා 4.8%කින් අවප්‍රමාණය වී ඇති බවත් ඉන්දියානු රුපියල 6.4%කින්ද, නේපාල රුපියල 6.2%කින්ද, ඉන්දුනීසියානු මුදල් ඒකකය 5.2%කින් ද අවප්‍රමාණය වී ඇති බවයි.

මේ අනුව මෙය ශ්‍රී ලංකාවට පමණක් සීමා වූ තත්ත්වයක් නොවන අතර තෙල් ආනයනය මත විශාල වශයෙන් රඳා පවතින රටවල් රැසකටම පොදුවේ බලපා ඇති ගෝලීය ආර්ථික කම්පනයක ප්‍රතිඵලයක් බව මහබැංකු අධිපතිවරයා සඳහන් කරනවා.

තවද 2022 වසරේ ශ්‍රී ලංකාව රුපියල දැඩි ලෙස අවප්‍රමාණය වූයේ රට තුළ පැවැති විශේෂිත ආර්ථික ගැටළු හේතුව ඇති බවද ඒ මහතා පවසනවා.

ඔහු කියා සිටින්නේ වත්මන් තත්ත්වය ඊට වඩා වෙනස්ව ජාත්‍යන්තර වෙළෙඳපොලේ ඇති වූ බලපෑම් සමඟ සම්බන්ධ බවයි.

විනිමය අනුපාතයේ වෙනස්වීම් පමණක් පදනම් කරගෙන රටක ආර්ථික කඩා වැටී ඇති බව නිගමනය කිරීම නිවැරදි නොවන බවද ඒ මහතා වැඩිදුරටත් කියා සිටියා.

“අපි වගේම තෙල් ආනයනයකරලා ගන්න රටවල් තියෙනවා. දැන් අපේ රුපියල අවප්‍රමාණය වෙලා තියෙන්නේ මේ වසර තුළ 4.8% කින්, ඉන්දියන් රුපියල 6.4%කින්, නේපාල් රුපියල 6.2කින් ඉන්දුනිසියන් රුපියල 5.2%කින් එතකොට මේක බැලුවාම පැහැදිලිව පේනවා මේ තියෙන අවප්‍රමාණයවීම ප්‍රධාන වශයෙන්ම මේ හා සමාන අනෙක් රටවලටත් පොදු දෙයක්. එ හා සමානව මේක වෙලා තියෙන්නේ. ඊට වැඩිය වෙනස් විදිහකට නෙමෙයි. ඒකට හේතුව තමයි බහුතරයක් තෙල් සම්පූර්ණයෙන්ම ආනයනය කරලා ඒ වියදම වැඩි රටවල්.

2022 වසරේදී තිබුණ තත්ත්වයකදී වුණේ අපේ රුපියල විශාල වශයෙන් අවප්‍රමාණය වුණා ලංකාවට පමණක් බලපාන හේතුනිසා ඒක ගෝලිය තත්ත්වයන් නිසා නෙමෙයි. දැන්වෙලා තියෙන තත්ත්වය අනුව ශ්‍රී ලංකාව තියෙන්නේ අනෙකුත් යම් කිසි ආකාරයක සංසන්දනාත්මක රටවල් අතර යම් ආකාරයක එක මට්ටමක තියෙනවා. එතකොට ඒක බාහිර කම්පන මත සිදුවන දෙයක්.

අපි දැකලා තියෙනවා බොහෝ වෙලාවට විනිමය අනුපාත මත සමහර විශ්ලේශකයෝ අදහස් ප්‍රකාශ කරලා තියෙනවා, අපි දකිනවා විනිමය අනුපාත අවප්‍රමාණය වෙනවා කියන්නේ රටේ ආර්ථිකය කඩා වැටෙනවා කියන එක. අපේ ප්‍රධාන මාධ්‍යවේදීයෝ එහෙම කරන්නේ නැහැ. දැන් ඉන්දියානු රුපියල ඉතිහාසයේ අඩුම අගයේ තියෙන්නේ, ඉන්දුනිසායානු රුපියල අද දිනයේ ඉතිහාසයේ අඩුම අගයට වාර්තා වෙලා තියෙනවා. නමුත් එකෙන් කියන්නේ නැහැ, ඒ රටවල ආර්ථිකය කඩා වැටෙනවා, අවිනිශ්චිතයි කියලා. ඒක වැරදි මතකයක්. විනිමය අනුපාතයක් දිහා බලලා රටක ආර්ථිකය හොඳද නරකද කියලා කියන්න අමාරුයි. එකේ දෙපැත්තක් තියෙනවා.”