රාජ්‍ය නිලධාරීන් ජනතාව අපේක්ෂා ඉටුවන රාජ්‍යයක් නිර්මාණය කරන්න කැප විය යුතුයි – ජනපති

පසුගිය ජනවරම තුළ ජනතාව තැබූ අපේක්ෂාවන් ඉටු කිරීමට වත්මන් රජය අපොහොසත් වුවහොත් ජනතාවට සුබවාදී අනාගතයක් පිළිබඳව සිහින දැකීම ද අත්හරිනු ඇති බව ජනාධිපති අනුර කුමාර දිසානායක මහතා පවසනවා.

ජනාධිපතිවරයා මේ බව සඳහන් කළේ මුදල් ක්‍රම සම්පාදන සහ ආර්ථික සංවර්ධන අමාත්‍යවරයා ලෙස අද (22) එම ආමාත්‍යාංශයේ දී වැඩ භාර ගැනීමෙන් අනතුරුව එහි කාර්යමණ්ඩලය අමතමින්.

ජනතා අපේක්ෂා ඉටුවන රාජ්‍යයක් නිර්මාණය කිරීමට රාජ්‍ය නිලධාරීන් කැපවිය යුතු බවද ඔහු මෙහිදී කියා සිටියා.

පසුගිය ආර්ථික කඩා වැටීම හමුවේ රට මුදා ගැනීමට මුදල් අමාත්‍යාංශයේ නිලධාරීන් ලබාදුන් දායකත්වය මෙහිදී කෘතවේදී අගය කළ ජනාධිපතිවරයා මින් ඉදිරියට ඇති ජයග්‍රහණ කරා යාමේ දී සියලු දෙනාගේ සහාය අපේක්ෂා කරන බවද සඳහන් කර තිබෙනවා.