විනෝදාස්වාද ක්ෂේත්‍රයේ (Entertainment Industry) පාර්ශ්වකරුවන් සහ එහි නිරත කලාකරුවන් ඇතුළු පිරිස් විසින් එල්ල කරන ලද දැඩි විවේචන සහ මතු කරන ලද ගැටලුකාරී තත්ත්වයන් සලකා බලමින්, ශ්‍රී ලංකා නිර්මාණකරුවන්ගේ සහ ප්‍රකාශකයන්ගේ සංගමය (ACPOSL) විසින් සියලුම බලපත්‍ර නිකුත් කිරීමේ කටයුතු තාවකාලිකව අත්හිටුවීමට ඓතිහාසික තීරණයක් ගෙන තිබෙනවා.
පසුගිය ඔක්තෝබර් 12 වන දින නිවේදනයක් නිකුත් කරමින් ACPOSL සංගමය සඳහන් කළේ, 2026 නොවැම්බර් මාසයේ පැවැත්වීමට නියමිත සංගමයේ වාර්ෂික මහා සභා රැස්වීම (AGM) දක්වා මෙසේ බලපත්‍ර නිකුත් කිරීමේ කටයුතු සම්පූර්ණයෙන්ම අත්හිටුවීමට එහි පාලක මණ්ඩලය ඒකමතිකව තීරණය කළ බවයි. පසුගිය සති කිහිපය තුළ ක්ෂේත්‍රයේ විවිධ පාර්ශ්වයන්ගෙන් ලැබුණු રચනාත්මක අදහස් හා යෝජනා පදනම් කරගනිමින් මෙම තීරණයට එළඹි බව එම සංගමය වැඩිදුරටත් අවධාරණය කරනවා.
මෙම බලපත්‍ර ක්‍රියාවලිය හේතුවෙන් යම් අපහසුතාවයක් හෝ ගැටලුකාරී තත්ත්වයක් උද්ගත වූයේ නම් ඒ පිළිබඳව සිය බලවත් කණගාටුව පළකරන ACPOSL සංගමය, පසුගියදා පැවැති මාධ්‍ය හමුවලදී සිදුකරන ලද ඇතැම් ප්‍රකාශයන්ගෙන් ක්ෂේත්‍රයේ පාර්ශ්වකරුවන්ට යම් සිත් රිදවීමක් සිදුවූයේ නම් ඒ පිළිබඳව ද තම කණගාටුව ප්‍රකාශ කර සිටිනවා.
යෝජිත බලපත්‍ර රාමුව සහ ඊට අදාළ ගාස්තු ක්‍රමවේදය දැඩි ලෙස සමාලෝචනය කර සංශෝධනය කිරීම සඳහා ක්ෂේත්‍රයේ සැබෑ නියෝජිතයන් සමඟ ඉදිරියේදී ව්‍යුහගත සාකච්ඡා මාලාවක් ආරම්භ කිරීමට කටයුතු යොදා ඇත. පාර්ශ්වකරුවන් විසින් මතු කරන ලද බරපතල ගැටලුවලට සාධාරණ විසඳුම් ලබා දෙමින්, සම්බන්ධ සියලු පාර්ශ්වයන්ගේ යහපත හා අයිතිවාසිකම් තහවුරු වන පරිදි නව රාමුව සකස් කිරීම මෙම සාකච්ඡාවල මූලික අරමුණයි.
එම සාකච්ඡා මාලාවෙන් අනතුරුව සකස් කෙරෙන සංශෝධිත රාමුව, එළඹෙන නොවැම්බර් මස පැවැත්වෙන වාර්ෂික මහා සභා රැස්වීමේදී (AGM) සාමාජික අනුමැතිය සඳහා ඉදිරිපත් කිරීමට නියමිතයි. අනතුරුව අදාළ නීතිමය පටිපාටියට යටත්ව එම සංශෝධිත රාමුව රජයේ ගැසට් පත්‍රයේ පළ කිරීමට කටයුතු කරන බව ද ACPOSL සංගමය තහවුරු කර සිටිනවා.
කෙසේ වෙතත්, මෙම තාවකාලික අත්හිටුවීම මඟින් සංගමයේ දැනට පවතින නීතිමය අයිතිවාසිකම්, නීතිමය පිළියම් හෝ සමස්ත නීතිමය තත්ත්වයට කිසිදු බලපෑමක් සිදු නොවන බව ද සංගමය වැඩිදුරටත් පැහැදිලි කර තිබෙනවා.
නිර්මාණකරුවන්, ගීත රචකයන් සහ ප්‍රකාශකයන් සඳහා වඩාත් සාධාරණ, පාරදෘශ්‍ය සහ තිරසාර පද්ධතියක් ගොඩනැගීම සිය මූලික අපේක්ෂාව බව පවසන ACPOSL සංගමය, මෙම නව වැඩපිළිවෙළ කෙරෙහි කර්මාන්තය තුළ නැවත විශ්වාසය ගොඩනැගීම සඳහා නිර්මාණකරුවන්, ප්‍රකාශකයන්, සංගීතඥයන්, උත්සව සංවිධායකයන් සහ ස්ථාන හිමියන් (Venue owners) ඇතුළු සියලුම පාර්ශ්වකරුවන්ගේ අඛණ්ඩ සහයෝගය අපේක්ෂා කරනවා.
Leave a Reply