ඇමෙරිකාව සහ ඊශ්‍රායලය එක්ව ඉරානයට එරෙහිව දියත් කර ඇති දැවැන්ත යුධමය වාතාවරණය හේතුවෙන් ලෝක වෙළෙඳපොළේ ඉන්ධන මිල ශීඝ්‍රයෙන් ඉහළ යාම පාලනය කිරීම සඳහා, සිය උපායමාර්ගික තෙල් සංචිතවලින් තෙල් බැරල් මිලියන 100ක් ඉදිරි මාස හතර ඇතුළත වෙළෙඳපොළට නිදහස් කිරීමට ජී-7 ප්‍රබල සංවිධානය තීරණය කර තිබෙනවා.
ප්‍රංශ ජනාධිපති එමානුවෙල් මැක්‍රොන්ගේ ප්‍රධානත්වයෙන් පැවැති තීරණාත්මක සාකච්ඡාවකින් අනතුරුව මෙම ඓතිහාසික තීරණය ගෙන ඇති අතර, ජාත්‍යන්තර බලශක්ති නියෝජිතායතනය (IEA) හරහා මෙම තෙල් නිදහස් කිරීමේ කටයුතු සම්බන්ධීකරණය කිරීමට නියමිතයි.
විශේෂයෙන්ම ලෝකය පුරා මතු වී ඇති දැඩි ඩීසල් හිඟයට වහා පිළියමක් ලෙස, මෙම සැලසුම යටතේ පළමු දින 20 ඇතුළත ඩීසල් සංචිත විශාල ප්‍රමාණයක් වෙළෙඳපොළට මුදාහැරීමටයි පියවර ගෙන ඇත්තේ.
මේ අතර, යුරෝපා රටවල් තමන් සතු ඩීසල් සංචිත වෙළෙඳපොළට මුදාහැරීමට පූර්ණ එකඟතාව පළ කළ බව ඇමෙරිකානු ජනාධිපති ඩොනල්ඩ් ට්‍රම්ප් නිල වශයෙන් ප්‍රකාශ කර සිටිනවා.
ඇමෙරිකාව තුළ ද ඩීසල් ගැලුමක මිල ඩොලර් 6.37 දක්වා අහස උසට ඉහළ ගොස් ඇති අතර, එළඹෙන නොවැම්බර් තීරණාත්මක මැතිවරණය හමුවේ මෙලෙස ඉන්ධන මිල ඉහළ යාම ට්‍රම්ප් පාලනාධිකාරියට එල්ල කළ දැවැන්ත දේශපාලන ප්‍රහාරයක් වී ඇති බවයි වාර්තා වන්නේ.
හෝමූස් සමුද්‍ර සන්ධියේ නාවික ගමනාගමනයට එල්ල වී ඇති දැඩි බාධා හේතුවෙන් මෙම සමස්ත ජාත්‍යන්තර බලශක්ති අර්බුදය නිර්මාණය වී ඇති අතර, තත්ත්වය පාලනය කිරීම සඳහා ඉදිරි දිනවලදී තවත් ප්‍රබල පියවර ගැනීමට G7 රටවල් සූදානමින් පසුවනවා.
Leave a Reply